Azərbaycanlı şahmatçı Rauf Məmmədov “Titled Tuesday” turniri üzrə Maqnus Karlsenlə görüşdə cəmisi bir gediş etdikdən sonra təslim olmasının səbəbini açıqlayıb.

İnfoteka.az xəbər verir ki, daha öncə də eyni hadisə Maqnus Karlsen və Hans Nimann arasında baş vermişdi. Norveçli dünya çempionu bir gediş etdikdən sonra təslim olmuşdu. 

Şahmat dünyasında baş verən bu gərginliyin səbəbi nədir? Rauf Məmmədovun "Levitov Chess"ə müsahibəsini təqdim edirik:

– Rəqibin Karlsen olmasına baxmayaraq, qələbə üçün oynayırdınız?

– 22 ildən çoxdur ki, onlayn blits oynayıram. Çoxlu şahmatçılarla tanış olmuşam. Bəli, Maqnus böyük çempiondur, amma blitsdə həmişə qalib gəlmək üçün oynayıram, hamı kimi.

– Dünya çempionu ilə oyun sizin üçün nə deməkdir: Xüsusi məna kəsb edir?

– Bilmirəm. 2015-ci il xüsusi idi. Lakin indi bir fərqi yoxdur. 2015-ci ildə Şəmkirdə oynayanda ad günümdə məğlub olmuşdum.

– Beləliklə, siz 1.e4 gedişini edirsiniz və 1…g5 cavabı alırsınız. İlk reaksiyanız necə idi?

– Nakamura belə oynasaydı, problem olmazdı. Lakin Maqnus Karlsen bunu edir... “Titled Tuesday" gözəl heyət toplayır, bütün insanlar şahmat oynamaq üçün buraya gəlir, kimsə pul qazanır. Və sonra – 1.e4 g5! Qərar verdim ki, davam etməyim. Əgər bizi ələ salmağa gəlirsənsə, bunu mənə qarşı edə bilməzsən. Haqlı olduğumu düşünmürəm, amma bütün hallarda bunun bir parçası olmaq istəmirəm.

– İndi sakit başla, hər hansı fikriniz varmı?

– Bəli! Təsəvvür edin, Mərkəzi Şahmat Klubuna  çox gənc Kasparov və ya Karpov gəlir, onunla üzbəüz reytinq əmsalı 2650-dən çox olan qrossmeyster oturub və o, 1.e4 g5 oynayır. Axı səni döyəcəklər, ha, ha!

– Məğlubiyyət düyməsini basmazdan əvvəl nə qədər düşündün?

– Bir neçə saniyə. Amma sizə bir sirr açım: Mən bilirdim ki, Maqnus bəzən belə oynayır. Mən isə özümə söz vermişdim: əgər mənimlə belə etsə, onda dərhal təslim olub çıxacağam. Təəssüf ki, bu, 10-cu turda, mən vahid lider olanda baş verdi.

– Sizcə, Karlsen niyə belə edir? O, həqiqətən də rəqibləri ələ salır, yoxsa…

– Mənə elə gəlir ki, o, “sığortalanıb” ki, Karlsendir, dünya çempionudur. Əgər turnirdə qalib gəlmirsə,  deməli, 1…g5 və ya 1.g4-ə görə belə olub.

– Bu olay gələcək münasibətlərinizə təsir edəcəkmi?

– Mənim onunla heç bir münasibətim yoxdur. Şahmatçı və dünya çempionu kimi ona hörmət edəcəyəm. Sadəcə, mənə elə gəlir ki, belə davranış yolverilməzdir, hətta sən başqalarından xeyli üstün olsan belə. Onunla gələcək qarşılaşmalarımıza gəlincə, Karlsenlə  tez-tez oynamıram.

– Başqa bir şey əlavə etmək istərdiniz?

– Ən əsası odur ki, mən heç kimə dərs vermək istəmirəm. Bu, mənim baxışımdır, onu heç kimə zorla qəbul etdirmək niyyətində deyiləm. Belə turnirdə 1…g5 gedişi… Dünya çempionunun belə hərəkəti səhvdir. Karlsenlə oyundan həmişə gözləntilər çox olur, amma bunun əvəzində ələsalma…