Trampın iyul ayında Türkiyəyə səfər edəcəyini deyən Ərdoğan "F-35" layihəsi haqqında da danışıb.

Türkiyə Prezidenti Rəcəb Tayyib Ərdoğan "G-20" sammitində iştirak etmək üçün getdiyi Yaponiyanın Osaka şəhərində bəyanatlar verib. Ərdoğan ABŞ Prezidenti Donald Trampın Türkiyəyə gələcəyini açıqlayıb. 

Yaponiyada ölkənin çox oxunan qəzetlərindən "Nikkei"yə xüsusi müsahibə verən Türkiyə Prezidenti bir sıra məsələlərə aydınlıq gətirib. Ərdoğan, ona verilən, "Trampın Türkiyəyə sanksiya tətbiq etməsinə mane ola biləcəksinizmi?" sualına "G-20 sammitində Tramp ilə görüşümüzün ikitərəfli münasibətlərin düyünlərini ortadan qaldırmaqda və tərəfdaşlığımızı gücləndirməkdə əhəmiyyətli olacağına inanıram" - deyə cavab verib. 

 Trampın iyul ayında Türkiyəyə səfər edəcəyini deyən Ərdoğan "F-35" layihəsi haqqında da danışıb: "Biz indidən "F-35" layihəsi üçün 1.25 milyard dollar vəsait ödəmişik. Əgər belə yanlış bir həmlə etsələr, beynəlxalq məhkəməyə verərik və xərclədiyimiz pulu geri istəyərik".