Polkovnik: “Yaxın günlərdə Ermənistanın təxribatlarının şahidi olacağıq”.
Ermənistan Ordusu bir gündə iki dəfə təxribata əl atdı. Azərbaycan Müdafiə Nazirliyinin yaydığı məlumata görə, avqustun 28-i saat 06:45 radələrində Ermənistan silahlı qüvvələrinin bölmələri Dəvəli rayonunun Arazdəyən yaşayış məntəqəsi istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonunun Heydərabad yaşayış məntəqəsi istiqamətindəki mövqelərini atıcı silahlardan atəşə tutub.
Nazirliyin digər məlumatına görə, avqustun 28-i saat 18:30-da Ermənistan silahlı qüvvələrinin bölmələri Paşalı rayonunun Sultanbəy yaşayış məntəqəsi istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Şahbuz rayonunun Şada yaşayış məntəqəsi istiqamətindəki mövqelərini atıcı silahlardan atəşə tutub. Qeyd olunan istiqamətdə bölmələrimiz tərəfindən adekvat cavab tədbirləri görülüb.
Ermənistanın mövqelərimizə atəş açması bölgədə hərbi gərginliyin geniş miqyas alacağı ehtimalını artırır. Ekspertlər hesab edirlər ki, bu insidentlər cavabsız qalmayacaq ki, bu da eskalasiya riskini artıran amildir.
Hərbi ekspert, ehtiyyatda olan polkovnik Üzeyir Cəfərov AYNA-ya müsahibəsində bildirib ki, Ermənistan ordusu bundan əvvəl Kəlbəcər, Tovuz istiqamətində də təxribatlara əl atıb:
- Həm mövqelərimiz atəşə tutulub, həm ermənilər havaya kvadrakopterlər qaldırıblar. Əlbəttə, Azərbaycan Ordusu bu təxribatları cavabsız qoymur. Bu zaman isə Ermənistana Avropadan gələn missiya öz qeydiyyatlarını aparırlar, yuxarı qurumlarına hesabatlarını verirlər. Bir növ bölgədə qalmaq gərəkliliyini nümayiş etdirmək niyyətində görünürlər.
İkincisi, Ermənistan burada sanki bir güllə ilə iki dovşan vurur. Həm Ermənistan Azərbaycanla sülh sazişini imzalamaqdan yayınır, zaman qazanmağa çalışır, həm də Qərbə vəziyyətin təhlükəli olduğunu göstərmək istəyir. Baxın, əvvəl Ermənistanın Baş naziri Nikol Paşinyan konstitusiya islahatlarının 2026-ci ildə həyata keçiriləcəyini bəyan etmişdi. Dünən isə Ermənistanın ədliyyə naziri islahatların 2027-ci idə həyata keçiriləcəyini bəyan etdi. Məlumdur ki, Azərbaycanın tələbi Ermənistan Konstitusiyasının dəyişdirilməsi, orada Azərbaycana qarşı ərazi iddialarına son qoyulmasıdır. Ermənistan konstitusiya islahatlarını 2027-ci ilədək uzatmaqla bəhanə əldə etmiş oldu.
- Bu üç il ərzində Ermənistan nə edəcək ki, zaman qazanmağa çalışır?
- Zaman qazanmaqla Ermənistan Qərb dairələri vasitəsilə silahlanma həyata keçirəcək. Bu müddətdə Rusiyanın patronajlığı altında olan Kollektiv Təhlükəsizlik Müqaviləsi Təşkilatı (KTMT) ilə yollarını tamamilə ayıracaq. Faktiki olaraq KTMT üzvü olan Ermənistan bu gün təşkilatın heç bir tədbirlərində, təlimlərində iştirak etmir. Yaxın vaxtlarda da bu iştirak gözlənilmir.
Bilirsiniz, təhlükəni saxlayan məqamlar çoxdur. Ona görə də bölgədə gərginliklər zaman-zaman hiss olunacaq. Ermənistan atəşkəsi dünən də pozurdu, bu gün də pozur, sabah da pozacaq. Yaxın günlərdə də Ermənistanın təxribatlarının şahidi olacağıq. Çünki tərəflər arasında sülh sazişi imzalanmayıb. Sülh yoxdursa, toqquşma riski hər zaman qalır. Bir növ, Ermənistan odla oynayır. Bəzi dövlətlər də Ermənistana sülh çağırışı etmək əvəzinə bu ölkəni silahlandırır, müxtəlif təkliflər irəli sürürlər. Düzdür, bir çox dövlətlər sülh danışıqları ilə bağlı platformalar təklif edirlər, sülhdən yana görünürlər. Amma onların səmimiliyinə inanmaq çətindir. 30 il müddətində ATƏT-in Minsk Qrupunun həmsədri olan dövlətlər guya sülhün əldə olunması üçün çalışdılar. Sonda Azərbaycan Ordusu problemi həll etdi. İndi həmin dövlətlər – ABŞ, Fransa Ermənistanı aktiv şəkildə silahlandırır. Əvvəl də bunu Rusiya həyata keçirirdi. İndi ABŞ səfiri bildirir ki, Ermənistana öldürücü silahlar verilmir. Bu, gülməlidir. Çox maraqlıdır, öldürməyən silah var ki? Yəni demək istəyirəm ki, Ermənistan işğalçı niyyətli ölkədir və onun silahlandırılması Cənubi Qafqazda alov sönməyəcək.
- Bu təxribatların Zəngəzur dəhlizi ilə əlaqəsi varmı? Erməni mediasında baş verənlərin dəhliz üzərində olduğunu iddia edir...
- Əlbəttə, gərginliyin səbəblərindən biri də Zəngəzur dəhlizidir. Bilirsiniz, bu təxribatların bir məqsədi də ondan ibarətdir ki, Azərbaycan gərginlikdən istifadə etsin, gücə əl atsın və dəhliz məsələsini həll etsin. Baxın, 10 noyabr 2020-ci ildə imzalanmış Üçtərəfli Birgə Bəyanatın bəndlərindən biri də kommunikasiyaların açılması ilə bağlı idi ki, burada əsas məsələ Zəngəzur dəhlizi idi. Ermənistan həmin Bəyanatın müddəalarını yerinə yetirmədikcə Azərbaycan hərəkətə keçdi və sənədin bəndlərini icra etdi. İcra olunmamış bircə bənd qalıb – Zəngəzur dəhlizi məsələsi. Bəzi güclər istəyirlər ki, Azərbaycanı bunu da həll etməyə təhrik etsinlər. Xüsusilə, Rusiya bunda maraqlıdır. Hesab edirəm ki, Azərbaycan təhriklə bu addımı atmamalıdır. Yəni yeni savaş Azərbaycanın maraqlarına uyğun deyil. Bəli, Ermənistan təxribat törədirsə, o zaman layiqli cavab verilməlidir. Amma bu insidentlərin genişmiqyaslı əməliyyata keçməsi bizim marağımızda deyil. Zəngəzur dəhlizi açılmalıdır, amma bu, danışıqlar yolu ilə, diplomatik yolla həll edilməlidir.
Anar Bayramoğlu
