“Türkiyənin milli müdafiə naziri Hulusi Akar və digər səlahiyyətli şəxslər problemin həlli və taxıl ixracının kəsilməməsi üçün təmasları davam etdirirlər. Müzakirələr zamanı taxıl sazişinin icrasının davam etdirilməsinin vacibliyi vurğulanır və bu prosesə mane olan hər cür təxribatdan uzaq durulmasının zəruriliyi xatırladılır”.

İnfoteka.az xəbər verir ki, bu barədə Türkiyənin Milli Müdafiə Nazirliyindən bildirilib.

Qeyd olunub ki, İstanbul limanında gözləyən taxıl yüklü gəmilərin bu gün və sabah yoxlanılması planlaşdırılır: “İstanbuldakı birgə koordinasiya mərkəzindəki ruslar hələ də buradadırlar. Lakin hələlik Ukraynadan gəmilər yola çıxmayacaq”.

Məlumata görə, Türkiyə regionda sülhün bərpasına bundan sonra da töhfə verməyə çalışacaq.

Qeyd edək ki, oktyabrın 29-da Rusiya “Taxıl sazişi”ndən birtərəfli qaydada çıxdığını açıqlayıb. Rusiya Xarici İşlər Nazirliyinin məlumatına görə, taxıl sazişinin icrası qeyri-müəyyən müddətə dayandırılıb. Rusiya taxıl sövdələşməsində iştirakını dayandırdıqdan sonra İstanbuldakı Birgə Koordinasiya Mərkəzində - Xarici İşlər Nazirliyindəki nümayəndələrinə tapşırıqlar verib.

XİN-dən bildirilib ki, Rusiya Sevastopolda baş verən terror aktına görə “Qara Dəniz Təşəbbüsü”ndə iştirak edən mülki quru yük gəmilərinin təhlükəsizliyinə zəmanət verə bilməz.