Kriptovalyuta birjaları Binance və FTX arasındakı gərginlik kriptovalyuta bazarlarında satışlara səbəb olub.

İnfoteka.az "Marja"ya istinadən xəbər verir ki, Bitcoin 18 min səviyyəsindən də aşağı düşərək 17 min 603 dolları görüb.

Gərginlik Binance-ın Baş direktoru Changpeng Zhao ilə FTX-in Baş direktoru Sam Bankman-Fried arasındadır. Bu yaxınlarda Changpeng Zhao-nun FTX-in tokeni FTT-də bütün mövqelərini bağladığını elan etməsi FTX-in iflası ilə bağlı narahatlıqları artırıb. Sam Bankman-Fried isə bazar ertəsi verdiyi açıqlamada heç bir problem yaşamadıqlarını bildirib.

Dünyanın ən böyük kriptovalyuta platformalarından biri olan Binance-ın, "likvidlik problemləri" yaşadığını iddia edərək rəqibi FTX.com-u alacağı xəbəri kripto aktivlərində geniş satış dalğasına səbəb olub.

Çərşənbə axşamı Binance, rəqibi FTX-i əldə etmək üçün danışıqlara başladığını elan edib. Açıqlamadan sonra əvvəlcə məhdud yüksəliş yaşayan və 20 mini keçən Bitcoin, daha sonra satışlarla 18 min səviyyəsindən də aşağı düşüb. Bakı vaxtı ilə saat 10:30-da Bitcoin 7%-ə yaxın ucuzlaşma ilə 18 min 404 dollardan ticarət olunub. Digər kriptovalyutalar da kəskin uculaşıblar. Ether, Polkadot, Avalanche, Solana və Dogecoin də kəskin satış dalğasından əziyyət çəkib.  

Zhao tvitində FTX-i əldə etmək üçün məcburi olmayan niyyət məktubu imzaladıqlarını açıqlayıb. Treyderlərin fikrincə, sövdələşmənin məcburi olmayan məktuba əsaslanması qeyri-müəyyənliyi artırır ki, bu da satış dalğasının artmasına səbəb olur.

Binance və FTX arasında soyuq müharibənin 2018-ci ildən bəri davam etdiyi məlumdur.