"Azərbaycan Dəmir Yolları" QSC-nin Mətbuat katibliyi şöbəsinin rəisi vəzifəsinə təyinat olub.
İnfoteka.az səhmdar cəmiyyətinə istinadən xəbər verir ki, bununla bağlı qurumun sədri Rövşən Rüstəmov əmr imzalayıb.
Əmrə əsasən, sözügedən vəzifə Sənubər Nəzərovaya həvalə edilib.
O, korporativ kommunikasiya və ictimaiyyətlə əlaqələr üzrə yerli və beynəlxalq təşkilatlarda 15 ildən artıq zəngin iş təcrübəsinə malikdir.
S. Nəzərova bakalavr təhsilini Xəzər Universitetinin Humanitar Elmlər fakültəsində ingilis və ərəb dilləri üzrə alıb, 2008-ci ildə Universitetin Beynəlxalq Münasibətlər fakültəsinin magistr pilləsini bitirib, 2009-2010-cu illərdə İsveçrə hökumətinin Cənubi Qafqazda həyata keçirdiyi “CABİR” proqramı çərçivəsində “The Graduate University of Geneve” də təhsil alıb, 2010-cu ildə isə İsveçrə Liderlik Mükafatının qalibi elan olunub. O, 2018-ci ildə BP və tərəfdaşlarının dəstəyi ilə həyata keçirilmiş Corc Vaşinqton Universitetinin “Layihələrin İdarəedilməsi” məktəbini uğurla başa vurub.
S.Nəzərova 2003-2010-cu illər ərzində Bakıda fəaliyyət göstərən bir sıra beynəlxalq təşkilatlarda və diplomatik korpuslarda media və kampaniyaların təşviqi üzrə məsul vəzifələrdə çalışıb, 2007-2010-cu illərdə Minilliyin İnkişaf Məqsədləri üzrə vəkillik və lobbiçilik kampaniyalarını həyata keçirən “GCAP Europe’’ koalisyasında MDB və Balkan regionları üzrə media əlaqələndiricisi vəzifəsini icra edib.
O, 2013-2020-ci illərdə “SOCAR AQS” MMC-də İctimaiyyətlə Əlaqələr şöbəsinin müdiri vəzifəsində çalışıb, 2021-ci ilin aprelindən 2022-ci ilin dekabrına kimi Rəqəmsal İnkişaf və Nəqliyyat Nazirliyi tabeliyində İnnovasiya və Rəqəmsal İnkişaf Agentliyində Aparatın İctimaiyyətlə Əlaqələr şöbəsinin müdiri olub.
S. Nəzərova T3 Vəkfi, Rəqəmsal İnkişaf və Nəqliyyat Nazirliyi, Türkiyə Sənaye və Texnologiya Nazirliyinin birgə təşkilatçılığı ilə 2022-ci ilin may ayında Bakıda ilk dəfə olaraq keçirilmiş “Teknofest Azərbaycan’’ Aerokosmik və Texnologiya festivalının PR meneceri vəzifəsini icra edərək tədbirin yerli və beynəlxalq mediada geniş ictimailəşdirilməsini uğurla həyata keçirib.
