"infoteka.az" xəbər verir ki, aprelin 27-də Suraxanı Rayon İcra Hakimiyyətinin təşkilatçılığı ilə Gülarə Əliyeva adına 3 nömrəli Uşaq İncəsənət Məktəbində Akademik, Əməkdar elm xadimi, görkəmli oftalmoloq-alim Zərifə xanım Əliyevanın anadan olmasının 100-cü ildönümünə həsr olunmuş tədbir keçirilib.
Tədbirdə Rayon İcra Hakimiyyətinin başçısı Əziz Əzizov, YAP Suraxanı Rayon təşkilatının sədri Vüqar Seyidov, RİHB-nin müavinləri, şöbə müdirləri, rayonun səhiyyə, təhsil və mədəniyyət müəsissələrinin nümayəndələri iştirak ediblər.
İlk öncə Ulu Öndər Heydər Əliyevin, akademik Zərifə xanım Əliyevanın və şəhidlərin əziz xatirələri bir dəqiqəlik sükutla anılıb və dövlət himni səsləndirilib, eləcə də Zərifə xanım Əliyevanın həyat və fəaliyyətini əks etdirən videoçarx nümayiş olunub.
Rayon İcra Hakimiyyətinin başçısı Əziz Əzizov çıxış edərək bildirib ki, akademik, görkəmli oftalmoloq-alim Zərifə xanım Əliyevanı xalqımız sonsuz hörmət və məhəbbətlə xatırlayır. O, qeyd edib ki, bugünkü tədbirimiz də Zərifə xanımın əziz xatirəsinə böyük ehtiramın ifadəsidir. Görkəmli oftalmoloq-alim Zərifə xanım Əliyevanın seçdiyi sənət də, mənalı ömür yolundakı yorulmaz fəaliyyəti də insanlara nur bəxş etmək üçün səbəb olub. Əziz Əzizov bildirib ki, oftalmologiya üzrə milli kadrların hazırlanmasında böyük rol oynayan, elmin bu sahəsinin inkişafına dəyərli töhfələr verən Zərifə xanım Əliyevanın həyat fəlsəfəsi çoxcəhətli və zəngindir.
Həmçinin, YAP Suraxanı rayon təşkilatının sədri Vüqar Seyidov, Suraxanı Tibb Mərkəzinin direktoru Aybəniz Saniyeva çıxış edərək bildiriblər ki, bütün mənalı ömrünü Vətəninin və xalqının tərəqqisinə həsr etmiş dahi şəxsiyyətin - ümummilli lider Heydər Əliyevin vəfalı, sədaqətli dostu və etibarlı silahdaşı olmuş Zərifə xanım Əliyevanın fəxri adları, elmi titulları, mükafatları olduqca çoxdur. Bu adların hər biri qürur və iftixar mənbəyidir. Amma bu adların sırasında ən şərəflisi Ana adıdır. Zərifə xanım Azərbaycana cənab İlham Əliyev kimi Prezident bəxş edən bir ana olaraq hər zaman tarixdə qalacaqdır.
Tədbirin bədii hissəsində musiqi məktəbinin “Dan Ulduzu” ansamblı tərəfindən Gülarə Əliyevanın repertuarından müxtəlif əsərlər ifa olunub.
