Mehriban Əliyeva Avropa çempionatının qalibi olan gimnastlarımızı təbrik edib

Azərbaycan Respublikasının Birinci vitse-prezidenti, Azərbaycan Gimnastika Federasiyasının prezidenti Mehriban Əliyeva mayın 21-də qrup hərəkətləri komandamızın Bakıda keçirilən bədii gimnastika üzrə 39-cu Avropa çempionatının qalibi olması  münasibətilə öz instaqram səhifəsində bununla bağlı paylaşım edib.

Mehriban Əliyeva instaqram hesabında etdiyi paylaşımında bu gözəl qələbə münasibətilə gimnastlarımıza təbriklərini çatdıraraq vurğulayıb: “Ura! Sizi təbrik edir, sizinlə fəxr edirəm! Çox möhtəşəmsiniz! Əməyinizə, qələbə əzminizə, gözəlliyinizə və zərifliyinizə görə çox sağ olun!”
Xatırlatmaq lazımdır ki, Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan və Darya Sorokinadan ibarət komandamız üç lent və iki topla hərəkətlərdə uğurlu çıxışlar nümayiş etdiriblər. Gimnastlarımızın möhtəşəm çıxışı hakimlər tərəfindən 32,250 xalla qiymətləndirilib.