Oktyabrın 13-də paytaxtımızda “Qarabağ”la “Olimpiakos” arasında baş tutacaq oyunun biletləri bazar günü səhər saatlarından satışa çıxarılıb.

Klubun sosial media səhifəsi ilk oyun günündə 22 min biletin satılması haqda məlumat yayıb. Lakin azarkeşlər narazıdır. Bu dəfə “i Ticket”in sisteminin yüklənməsindən və donmasından yox. Biletlərin satışa xəbərsiz çıxarılmasından və qısa müddətdə münasibət qiymətə olan biletlərin tükənməsindən. Ehtimal olunur ki, uyğun sıra və cərgələrə 5 manatlıq biletlərin bitməsinin əsas səbəbi işbazların hərəkətə keçməsinə görədir. Yəni 5 manata alınan biletlər matç günü “qara bazar”da 2-3, bəlkə də 4-5 qat artıq qiymətə satılacaq. Lakin narahatlığa gərək yoxdur.

Xəbəriniz olsun ki, məlum məsələ Daxili İşlər Nazirliyinin diqqətindədir. Artıq işbazlarla bağlı məsələ nəzarətə götürülüb. Bu gündən başlayaraq oyunun başlama saatına qədər sosial şəbəkə hesablarında və stadiona yaxın ərazilərdə biletləri baha qiymətə satmaq həvəsinə düşənlər həbs olunaraq məsuliyyətə cəlb olunacaq.

Oktyabrın 13-də Avropa Liqasının qrup mərhələsinin 3-cü turu çərçivəsində “Qarabağ”la “Olimpiakos” arasında baş tutacaq qarşılaşma saat 20:45-də başlayacaq.